Saturday, April 25, 2015

مناكيري بمختلف درجات الأحمر.. تعالوا أراويكم

لما تتذكرون مارلين مونرو كيف تتذكرونها؟ عن نفسي أكثر شي يذكرني فيها و بأنوثتها الروج الأحمر و المناكير الأحمر..
مشكلتي لما أعلق على لون أتمسك فيه و كل شي أشتريه من ملابس ، شنط أحذية مكياج يصير بهاللون..
مرت فترة صابتني حمى الأحمر و علقت عليه خاصة في المناكير و شريت كم لون بدرجات مختلفة..

تعالوا أعرفكم على حبايبي


من اليسار الأسماء بالترتيب
1. After sex from Essie
 وصف اللون أحمر برغندي و فيه ذرات غليتر..
ما وايد أحب المناكير مع الغليتر بس حبيت اللون مع أني مو وايد أحب ماركة ايسي 
الفرشاة بايخة في الصبغ و التركيبة ما تنشف بسرعة
بس أسعارهم معقولة


2. Carnal Red from Tom Ford
وصف اللون بعض المواقع تصفه بأنه أحمر حقيقي بس أحسه شوي فيه سحنه برتقالية
الزجاجة فاخرة مثل كل منتجات توم فورد و أكيد أسعارهم نار..اذا ماني غلطانة سعر الوحدة على 16 ريال عماني
اللون يجنن يجنن
ينشف بسرعة و الفرشاة روعة و دقيقة
البعض ينتقد هاللون أنه مو وايد كريمي مثل باقي مناكير توم فورد بس ما حسيت بهالشي



3. Pirate from Chanel
وصف اللون أحمر بس السحنة فوشيا
هاللون بعد يهبل و عندهم روج بنفس الاسم و اللون..
طبعا محد مثل شانيل في جودة مناكيرهم
مناكيرهم بالنسبة لي الأفضل
و نفس أسعار توم فورد علي 15 ريال عماني
بس الزجاجة عادية ما فخمة.. عاد ليش مغليين علينا ما أدري
الفرشاة لا يعلي عليها و اللون كريمي و ينشف بسرعة



4. Rouge Dada from YSL
وصف اللون أحمر عقيقي.. لونه جاي ع غامق مثل الدم
مناكيرهم كريمية رغم أن ألوانهم محدودة
و جودتها عالية سواء من ناحية الفرشاة أو سرعة جفافهم على الظفر
ما أذكر الأسعار ...


5. Massai from Dior
وصف اللون بالنسبة لي هذا بينهم اللي أقدر أقول عنه أحمر كلاسيكي
اللون هذا كريمي و جميل
الفرشاة حلوة و اللون ينشف بسرعة
بس مو كل ألوان ديور بنفس الجودة ..
عندي كم واحد متحسفة عليهم..
و هم ما أذكر الأسعار


بس اللي بالفعل المفضل عندي هو مل ايف سان لوران


و بس هذا بوستنا لليوم 
عسى يكون خفيف عليكم
و تكونوا استمتعتوا فيه
أشوفكم على خير


مع تحياتي
صفاء


Thursday, April 23, 2015

لمحة عن كريم أساس Vitalumiere Aqua من شانيل

صباح/مساء الخيرات يا صبايا يا حلوات

 اليوم بعد انقطاع بكلمكم عن كريم أساس 
Vitalumiere Aqua from Chanel
لكل محبات اللوك الطبيعي راح تحبوه مثل ما أنا حبيته..أساسه مائي يعني ترطيبه حلو بس ما أعتقد انه يناسب البشرة . الجافة .. بس البشرة العادية و الدهنية و المختلطة بيناسبهم.. أنا بشرتي مختلطة للعلم..

الحلو بالأساس غير مظهره الطبيعي و اندماجه مع البشرة بكل سلاسة أنه ما يدهن معاج بعد كم ساعة خاصة مع أجوائنا الجميلة في الصيف.



طبعا العالم أغلبها هبت في اسفنجة البيوتي بلندر .. موجودة بالصورة فوق..
أنا ما حبيتها لتوزيع الأساس ..أغلب كريمات أساسي سائلة و الاسفنجة تتشرب الأساس بس تعطي نتيجة مخملية خاصة اذا استخدمت رطبة.. ركزوا قلت رطبة مو مبللة.. يعني تبللينها و تعصرينها عصر من الماي بتلاحظين انها انتفخت شوي تركيها لدقيقة أو اثنين و بعدين استخدميها..
البعض يحب يستخدمها جافة بس نتيجتها وايد أحلي و هي رطبة..
..تخلي الأساس يتداخل مع مسام البشرة

صرت استخدم الاسفنجة بطريقة ثانية أني أوزع الأساس بفرشاة 
Real Technique: Face Expert Brush
ما أذكر سعرها بالضبط بس أسعارهم وايد رخيصة و فرشاهم ممتازة

جربت كذا فرشاة للأساس بس هي الأفضل بلا منازع
أصلا شكل الأساس جميل و طبيعي و مخملي مع هالفرشاة حتي لو ما استخدمتي الاسفنجة

طريقتي في التوزيع كالآتي بعد ما أرطب بشرتي و أحضرها بالبرايمر أوزع كريم الأساس بالفرشاة بحركات دائرية لحد ما تختفي الخطوط اللي تنتج من الفرشاة و بعدها بالاسفنجة المبللة مل بيوتي بلندر أطبطب على وجههي بالكامل..
انتبهوا طبطبة شوي شوي مو مسح..

و بعدها أثبت الأساس بالبودرة المضغوطة من شانيل و هاي صورتها تحت


هالبودرة تثبت لج الأساس مدة أطول و تمنعه يسيح أو يتغير عليج..
و ريحتها عطرية بس خفيفة مو الريحة المزعجة اللي تغث..
البودرة معاها فرشاة ناعمة و حلوة بس أفضل هالفرشاة.. توزع البودرة بشكل ناعم بدون تكتلات..
هالفرشاة من ماك و رقمها 187
بس انتوا ممكن تاخذوا أي فرشاة شبيهة من أي ماركة تحبوها

عذروني بالنسبة للأسعار كلش كلش ما أتذكرها..
أنا خذيت الأساس و البودرة من كيميز فرع القرم..
الفرشاة مل ماك من ماك طبعا..
و اسفنجة البيوتي بلندر و فرشاة الريل تكنيك خذيهم اونلاين من الأمازون

و هذا كل شي لليوم..
اتمنى يعجبكم البوست و تستفيدوا منه



أشوفكم على خير
مع تحياتي 
صفاء