Tuesday, October 27, 2015

تعالوا معاي نتكلم عن Gucci و مكياجهم

مساء/صباح الخيرات
اليوم بنبدأ أول موضوع من سلسلة الماركات
الماركة اللي ببدأ فيها هي
Gucci
حبيبة الجماهير سواء بالساعات أو الشنط أو العطور أو الملابس
و من الماركات الجديدة في عالم المكياج
بدأت من حوالي سنة اصدارها

شفت كثير من المدح على مكياجهم و أنا من الأول قبل ما ينزلون رسميا كنت أشوف الباكج مالهم و ألوانهم و متحمسة أجربهم
و شريت كم منتج منهم 
خلينا نشوف صورة جماعية لعيالي الجدد

خذيت منهم بيس و فاونديشن و بودرة مضغوطة و بلاشر و روجين و قلمين للعيون

و نجي للتفاصيل 
 الأسود هوالبيس و هو منتج ينحط قبل الفونديشن و بعد المرطب وظيفته يهيأ البشرة لاستقبال الفونديشن
توزيع الفونديشن يصير سلس و ما يخطط أو يتقطع 
.بعض الأنواع من البيس تؤدي وظائف ثانية مثل التصحيح أو الترطيب أو اضافة رونق و اشراقة للبشرة

هذا البيس يخلي الفونديشن سلس التوزيع و يعطي نضارة و تمتصه البشرة و الفونديشن يصير فيه لمسة مخملية
 وجربته مع فونديشنات ثانية و عطاني نفس النتيجة
ونوعه سيرم و هالأنواع تعبي الخطوط و العلامات التعبيرية بالوجه و الخطوط و التجاعيد الصغيرة

الفونديشن عجيب عجيب ما يدهن و ثابت لعشر ساعات .. 
ما جربته لفترة أطول بس ظل مثل ما هو 
و كذا حد يسالني عن الفونديشن لأنه منور وجهي
و فيه حماية من الشمس SPF 25


مثل ما انتوا شايفين الاثنين فيهم ضواغط يعني ما مجال يدخل هوا و يتأكسدوا و الضواغط تعطي الكمية اللي تحتاجيها مو كثير و لا قليل

و صورة مقربة للحلوين
البيس اسمه
Silk Priming Serum Base
و الفونديشن اسمه
Lustrous Glow Foundation


نجي للبودرة المضغوطة
استخدمها لتثبيت الفونديشن 
البعض ينتقد هالحركة و يقول هالبودرة للتعديل و الرتوش ما هي مخصصة للتثبيت
أنا وحدة ما أمشي على القوانين 
المكياج فن و ابداع مثل الرسم ..ما يتبع قواعد
أنا هالشي مناسبني و معطيني نتيجة فلة 
ما علي من حد ..هههههخ
المهم هالبودرة مثل خواتها اللي فوق .. مخملية و ما فيها لون و تثبت الفونديشن عدل و ما أحتاج أطبب أو أعدل 


مثل ما أنتوا شايفين غوتشي مبدعين في الباكجنغ
قمة في الفخامة العلب
و شعار غوتشي على البودرة نفسها>>> قلوب 
و تجي معاها الفرشاة هذي
بس أنا ما أستخدمها مع أنها ناعمة
أحب أستخدم فرش كبيرة لتوزيع البودرة 
تعطي نتيجة أحلى

هذول درجاتي في الفونديشن و البودرة


و هذا البلاشر

الدرجة 020
Coral Flower
اللون بالصورة جاي وردي بس بالأصل هو مشمشي فاتح
وايد لونه ناتشورال على الخد
العلبة التسكيرة مالها مغناطيسية
و فخمة و أنيقة
و اللون ثابت و بالمرة شوية منه يطبع 
و معاه فرشاة بس ما أحب فرشهم توزيعها بايخ


و نجي للأرواج
تحف فنية...يهبلون
ترطيب و أناقة و لون ثابت و قوي 
في بعض الرفيوز يقولوا ان الأرواج فيها طعم مثل الصابون ما حسيت بهالشي
و أن ريحتهم مزعجة هم ما أزعجتني الريحة بالعكس حبيتها

و هذي درجاتهم
على اليسار Whisper 20
و على اليمين Cashmere 50


اللون Whisper على هالبلوغر

ما لقيت اللون الثاني على الشفايف بس حطيت هالصورة فيها المقارنة بين اللونين


 و أخيرا أقلام العيون
أخذت لونين أزرق 
و الثاني أخضر

هذول من قريب

و هذول مفتوحين

و هذي سواتش على ايدي
الألوان ما جربتها كايلينر ..استخدمتها ككحل لداخل العين
الألوان قوية و من أول خط تبين
طبعا الثبات مل كم ساعة بس كحال ككل الكحال لأن عيني تدمع وايد فالكحل ما يثبت عندي أكثر ثلاث الى أربع ساعات
بس الألوان رهيبة
أكيد لي عودة أخذ ألوان ثانية من الكحال و الأرواج و البلاشرات

ما تشجعت أخذ من المناكير لأن ما حبيت كولكشن الألوان
و الشدو ما أحطهم بشكل يومي فما كانت الرغبة أني اشتريهم مع أني سمعت مدح وايد ليهم
و الماسكرا يمكن أجرب منهم

بالنسبة لأماكن تواجدهم موجودين في بوتيكات غوتشي و محلات باريس غالري في دبي مول
و بالنسبة للأسعار ما تحضرني 
بس راح أحط لكم الأسعار من موقع غوتشي
الفونديشن 65$
البودرة 55$
البلاشر 49$
البيس 52$
الأرواج 39$
اقلام العين 32$
و سلامتكم
مع تحيتي
صفاء

Thursday, October 8, 2015

الأرواج السائلة من Anastasia Beverly Hills

مساء/صباح الفل و الياسمين
اليوم بعد بنتكلم من منتج من نفس الماركة اللي تكلمنا عنها أمس
Anastasia Beverly Hills

مبدعين هالماركة كل شي جربته منهم حبيته..
من الأمور اللي هبيت فيها الفترة الأخيرة هي الأرواج السائلة
Liquid Lipsticks

 كثير من الماركات طلعوا هالنوع من الأرواج سواء كانوا ديزاينرز أو درغستور
جربت كذا نوع من كذا ماركة
ان شاء الله بيكون لي حديث عن الأنواع الثانية
أغلب الماركات يكون الروج مطفي أو يصير مطفي بعد فترة من وضعه
بس البعض يظل سائل و كريمي مثل شانيل و ميكب فور ايفر

الأرواج اللي بخبركم عنها اليوم من النوع اللي يصير مطفي بعد فترة
بس شنو ثبات عليها..روعة
أكلت و شربت و قعدت فيها أكثر من ثمان ساعات و الروج شوي بس بهت لونه
و لما جيت أشيله ما قدرت بدون مزيل خاص بالروج السايل بيكون لي حديث عنه في المستقبل
..و الألوان غنية و قوية
هي شوي ناشفة يعني يفضل شفايفك تكون مقشرتها و مترطبة عدل قبل ما تحطين هالأرواج



أخذت أربع أالوان
طبعا ما كانت الماركة متوفرة وقتما طلبتها فقمت و طلبتها أونلاين
اللونين على اليمين من البست سيلرز مالهم
 Best sellers
و اللي على اليسار خذيت فيهم مقلب
ألوانهم على الطبيعة وايد فاقعة أو على الأقل على لون بشرتي وايد فاقعين!!
فصرت أستخدمهم عشان أسوي 
Ombre Lipstick
مثل هالصورة

طلعوا روعة 
و هذي صورة مقربة للألوان

و هذي أسمائهم بالترتيب


و هذول سواتش للأروج
Baby Pink

Neon Coral

Trust Issues

Veronica

و بس عسى تكونوا استانستوا
أشوفكم على خير
صفاء

Wednesday, October 7, 2015

Anastasia Beverly Hills Contour cream kit VS Kryolan foundation wheel

مساء/ صباح الورد
من زمان ما كتبت مواضيع ..صايرة كسولة في الكتابة ..
خلاص ان شاء الله ارجع أكتب لكم مواضيع دسمة من اليوم و طالع

خليني بالأول آخبركم مخططاتي
بكتب مواضيع متسلسلة 
بيكون في سلسلة المواضيع عن ماركات معينة
يعني بنتكلم عن ماركة معينة و بخبركم عن المنتجات اللي جربتها منهم و كيف كانت تجربتي معاهم

و بيكون في سلسلة عن مواضيع المقارنات
يعني باخذ منتجين أو أكثر من ماركات مختلف يأدوا نفس المهمة و بنقارن بينهم من حيث الأداء و الثبات و الألوان و مدى توافرها و أسعارها

و يمكن أسوي سلسلة مواضيع عن المفضلات (Favourites)
 و سلسلة عن المنتجات اللي خلصتها و رأئي فيها (Empties)
 خليني أشوف تفاعلكم و تشجيعكم معاي 

اليوم بتكلم عن أول المواضيع المتسلسلة في المقارنات
بنسوي مقارنة بين 
باليتين للهايلايت و الكونتور من النوع الكريمي
الباليته الأولى 
 Anastasia Beverly Hills - Contour Cream Kit (Medium)

 و الباليته الثانية
Kryolan


نبدأ بالأولى

 الباليته هذي في منها أربع أنواع
Fair, Light, Medium, Dark
تتدرج من الفاتح الى الغامق 
لما اشتريت هالباليت كانوا ثلاثة أنواع فقط و خذيت المتوسط لأن ألوانه كانت تناسبني
بس لما طلعوا الفير غيروا اللايت بعد
أنتوا قبل ما تشترون شوفوا الألوان و احكموا بروحكم
كل باليت فيها ست ألوان تصلح لتصحيح العيوب من كنتور و كونسيلر و هايلايت و غيره
هذي الألوان اللي بعلبتي مع الأسماء



و هذي العلبة مفتوحة

استخدمت كل الألوان عدا اللون "كريم" ما عرفت في ايش استخدمه!
 طريقتي في التوزيع
بعد ما أوزع الفونديشن و الكونسيلر و قبل ما احط البودرة
أخذ فرشاة الفوندشن من بوبي براون و أوزع على وجهي
صورة الفرشاة موجودة بالصورة الأولى
 استخدم اللون "شوكليت" و اللون "سينامون" للكونتور
و اللون "بانانا" للهايلايت
 و اللون "نيود" كونسيلر
و أخيرا اللون "وارم كورال" كبلاشر و ممكن يستخدم كمصحح تحت الهالات مل العين اذا كانوا غامقين
بالنسبة للمناطق الدقيقة مثل الأنف استخدم فرشاة الكونسيلر الصغيرة من ماك242

 و بعد ما أوزع أخذ البيوتي بلندر الوردية و هي ندية يعني تبلل و تنعصر من الماي و نفس الشي موجودة بالصورة الأولى
و أدمج بطريقة الطبطبة
الطريقة نفسها موجودة في هالفيديو تحت




هي ما تثبت بالبودرة بس بشرتي تصير مصنع دهون بدون بودرة فأثبتها ببودرة حرة بالفرشاة على خفيف عشان ما يخترب الكونتور
البعض بعد هالخطوة يعيد على الكونتور و الهايلايت بكونتور و هايلايت بودرة ..
أنا أسويها اذا مناسبة كبيرة أو المناسبة فيها تصوير يطلع اللوك أحلى


نجي للباليته الثانية
الباليته فيها ثلاثة ألوان فقط
الفاتح هايلايت و الغامق كونتور و اللي بالنص ممكن كونسيلر و ممكن فونديشن
طريقة التوزيع نفسها بالضبط مثل طريقتي في باليته الانستازيا و نفس الأدوات


:المقارنة بينهم
:مميزات  باليته الانستازيا
 اكثر من اختيار لألوان الكونتور و الهايلايت*
الدمج و التوزيع سلس و سهل*
النتيجة لوك ناتشورال*
الألوان ثابتة لساعات و ساعات
أول ما يندمج مع البشرة ما يعود دهني*
في أربع أنواع للباليته بحيث تناسب كل بشرة و كل تون*

:عيوبها
لا يوجد


:مميزات باليته الكريولاين
الحجم الصغير بحيث ممكن تأخذ بالشنطة*
يعطي لوك ناتشورال*
الألوان ثابتة لساعات و ساعات*

:عيوبها
لون للكونتور و لون للهايلايت فقط*
ما راعوا ألوان البشرات المختلفة هي باليته وحدة لكل البشرات*
الدمج متعب شوية معاه و ياخذ وقت أكثر عشان توصلي لنتيجة مرضية*
يظل دهني حتى بعد الدمج و لازم يثبت ببودرة*

:أماكن الشراء
انستازيا ممكن تطلبوها اونلاين و ممكن تلقوها في سيفورا ب $64.99
و كريولاين موجودة بمحل كريولاين نفسه$58.99

و عسى تكونوا استفدتوا
مع محبتي
صفاء