Intensive Skin Serum Foundation from Bobbi Brown Review

 مساء الورد صبايا

اليوم حديثنا عن فاونديشن 

Intensive Skin Serum Foundation 

From Bobbi Brown

هالماركة عشقي و تقريبا كل شي جربته منهم حبيته عدا غرضين 

بخبركم عن واحد منهم اليوم

انتشرت الفترة الأخيرة موضة الفونديشن السيروم

و كثير من الماركات اصدرت فونديشن سيروم مثل ايف سان لوران و باي تيري و بوبي براون و غيرهم 

تكلمت هنا  عن فونديشن باي تيري 

ليش هالضجة على السيروم فونديشن؟

أغلبنا نبي بشرتنا طبيعية و مصقولة و نضرة و بدون عيوب .. نبي فونديشن ما يبين أنه فونديشن..صح؟؟

بالإضافة للتغطية و اللوك الطبيعي ما نبيه يضر بشرتنا بالعكس يرطبها و يحميها و يعالجها ...

هن يجي دور السيروم فونديشن عشان يسوي كل هذا...وييييي

من أشهر الماركات اللي انتجت هالنوع من الفونديشن بالإضافة للي ذكرتهم فوق

Bare Minerals

Perricone MD

YSL

اليوم حديثنا عنن هالفونديشن

اللي شريته في نهاية العام المنصرم.. صار لي أربع شهور استخدمه

المنتج يعد ببشرة صحية و طبيعية و بدون شوائب و بنضارة كونه مو بس منتج تجيلي فقط هو أيضا منتج علاجي مقاوم لعلامات الشيخوخة كونه يحتوي على مصل علاجي و أيضا فيه واقي من الشمس بنسبة 

SPF 40

اللي اكتشفته أن واقي الشمس 40 فيه 17 درجة 

و واقي الشمس 35 فيه4 درجات كلها غامقة

المنتج يناسب البشرة العادية و الجافة 

مع أن بشرتي مختلطة بس في الشتاء تميل للجفاف عشان كذا أتشجعت استخدمه

كونه سيروم فونديشن أيضا يعبي الخطوط التعبيرية و التجاعيد الصغيرة ..

طريقة وضعه

المنتج فيه قطار ..يخض بقوة ليما يختلط مع بعض

يقطر منه قطرات على ظهر اليد أو فرشاة الفونديشن و يوزع بأي طريقة تحبيها بالبيوتي بلندر أو الأصابع أو أي اسفنجة فونديشن أو فرشاة فونديشن..

النتج فيه خاصية اعتماد اللون بحيث أن لون الفونديشن يتغير مع الوقت و ياخذ لون بشرتك طبعا لازم اللون يكون من لون بشرتك و أيضا السحنة صحيحة

رائي في المنتج

بصراحة أول مرة في حياتي ما يضبط فونديشن على وجهي تخيلوا رغم كل هالوعود و كونه من ماركة كل شي فيها رائع..

مافي طريقة ما جربتها معاه.. حطيته مع واقي شمس و بدون 

جربته كل أنواع البيس اللي عندي من توم فورد و من غوتشي و من تارت وباي تيري..

و جربته بدون بيس

و جربت أوزعه مع بيوتي بلندر و مع أكثر من نوع من الفرش و بأصابعي 

و جربت أحطه بعد فيشل و ماسك مرطب و تقشير و حف كامل للوجه

و مع مرطب خفيف و مرطب ثقيل

و مع بودرة مضغوطة و بودرة حرة و بدون بودرة

و مع مثبت مكياج و بدون

أول ما أحطه اللوك flawless

بس بعد 3-4 ساعات في مناطق يتكتل فيها بشكل بشع

كرهته بقوة..كل شي حاولت فيه معاه و ما راضي يثبت لوقت أطول و يتكتل في المناطق الجافة من وجهي مثل جوانب الأنف و الخدود و المناطق اللي تميل أنها تكون دهنية عادي شكلها..

الظاهر أن المنتج يناسب البشرات الدهنية مو العادية أو الجافة كيف ما يعد المنتج

بجربه في الصيف و أشوف النتيجة

مكان الشراء و السعر

أخذته من محلات

Bloomingdales

دبي مول و سعره كان 325 درهم اماراتي

مقارنة بينه و بين 

skin foundation from Bobbi Brown

طبعا توقعت نتيجة مشابهة  بس الفونديشن الأخير عكس الأول .. يعطي ترطيب و نتيجة طبيعة و لوك 

flawless

و يدوم لساعات طويلة بدون تكتل أو دهون

و هذا كل شي لليوم

مع تحياتي

صفاء