صباح/مساء السعادة
بخبركم اليوم عن هالفونديشن العجيب من توم فورد
ترا أنا وحدة تعشق الفونديشن و الماسكرا و الأرواج ما أشبع منهم
قريت وايد عن هالفونديشن نزل السنة الماضية و سوا ضجة كبيرة
توم فورد عنده فونديشنين غير هذا
:الأول
ستيك فونديشن
:و الثاني
سائل
الستيك علي اليمين
و السائل المربع على اليسار
الستيك بطبيعة الحال يكون ثقيل على البشرة لانه يكون فل كفر و مناسب للمناسبات و التصوير
و السائل تغطيته خفيفة و شكله طبيعي على البشرة و خفيف
اللي عندي جاي بينهم
لا هو ثقيل مثل الستيك و لا هو خفيف مثل السايل
مثل اسمه برفكت
و فيه حماية من الشمس
SPF15
و أخذت معاه هالبيس
Illuminating Primer
من اسمه يعطي رونق و نضارة للبشرة
و ذكرت في مواضيع قبل ان البيس يسهل توزيع الفونديشن و يزيد ثباته
و البيس فيه ميزة بعد أن البشرة ما تدهن معاه
يعني يناسب أصحاب البشرات الدهنية و المختلطة
و الفونديشن جربته لأكثر من عشر ساعات و ثباته عجيب في الصيف و تحت الشمس
ما يسيح و مع البيس ما يدهن
و الفينيش ماله ساتين يعني مخملي و أنا أحب هالفينيش ما أحب المطفي
و غير الرونق تحسي بشرتك صحية و نضرة
باختصار أنصحكم بقوة بالفونديشن و البيس
سعره شوي غالي ب $80
بس يسوي كل سنت فيه
و فيه 15 درجة و لسحنات مختلفة دافية و باردة و نيوترال
طبعا توم فورد الباكجنغ ماله راقي جداً
شايفين الضواغط مالهم كيف
تلفي الزجاجة و يطلع الضاغط ما فيه غطا و لما يطلع السايل ما يوسخ و يلعوز
هذا رقم و اسم الدرجة اللي خذيتها
اللون هذا نيترول بيج
و جاي على مشمشي
اللون مناسبني بقوة
درجاتهم تناسب كل البشرات من الفاتح للغامق و كل السحنات
$و بالنسبة للبيس سعره 75
و هذا كل شي لليوم
و بيكون لي حديث يوما ما عن أرواجهم و مناكيرهم و ماسكرتهم
بس شجعوني بتعليقاتكم عشان أواصل
مع محبتي
صفاء
