مرحبا يا حلوين..
طولت عليكم واجد هالمرة بس انشغلت لظروف أقوي مني..ان شاء الله بتشوفون مواضيع تعجبكم بالأيام الجاية..
بكلمكم اليوم عن كم غرض خذيته و حبيته من ماركة مكياج اسمها
"By Terry"
مؤسسة الماركة اسمها
Terry Gunzburg
من عايلة محبة للعلم و ابوها كان صيدلاني ، هي نفسها كانت تدرس طب
و في سنة 1975 اكتشفت ميولها للفن و عالم التجميل و تركت دراستها للطب
و بدأت بدراسة التجميل
و في سنة 1985 اشتغلت في
Yves Saint Laurant
و ظلت هناك مدة 15 سنة
و تعلمت الكثير من شغلها هناك و اخترعت قلم الإضاءة الشهير
Touche Eclat
و في سنة 1998 قررت تترك ايف سان لوران
و تؤسس ماركتها الخاصة و ولدت ماركة
"By Terry"
الماركة تجمع في تغليفها الفخامة و مو بس تتميز بالتغطية الممتازة
الماركة منتجاتها علاجية و اغلب المنتجات فيها مواد تحارب علامات الشيخوخة
أول تجاربي من هذي الماركة كانت ثلاث منتجات
فونديشن و برايمر و كونسيلر
نبدأ بالبرايمر
TERRYBLY DENSILISS PRIMER
مرة يقولوا عليه برايمر و مرة يقولوا عنه بيس
في فرق طبعا بين الاثنين
البرايمر يهيأ البشرة لاستقبال المكياج و ما يترك أي لون على البشرة
سواء من ناحية الترطيب أو النضارة أو كونه يخلي البشرة مطفية و غيرها من مميزات البرايمرات
بس البيس يهيأ البشرة من ناحية اللون بتوحيد لونها
بالعادة البيس يستخدم على العيون و الشفايف عشان يظهر ألوان الشادو و الأرواج
..المهم في هالقصة هذي كلها أن هذا برايمر
المنتج مذكور عليه أنه فيه مصل مضاد للتجاعيد و يساعد على شد و تمليس البشرة
اللي شفته بأنه بالفعل البشرة تكون ناعمة و مشدودة و الفونديشن يتوزع بسهولة و سلاسة أكثر اذا هالبرايمر توزع قبله
البرايمر حلو مع الفونديشن اللي من نفس المجموعة أو أي فونديشن ثاني
الحلو في هالمجموعة كونها من نوع السيروم أو المصل و لها فوائد علاجية بدون ما تؤثر علي جودة و تغطية الفونديشن
بيكون لي حديث عن هالنوع من الفونديشنات بالتفصيل في موضوع مستقل
.التغليف أيضا ممتاز لأن فيه ضاغط فما يتعرض المنتج للهواء و التأكسد
ما شفت أي عيوب تذكر في المنتج
نجي الحين للفونديشن
TERRYBLY DENSITIES FOUNDATION
مثل ما ذكرت فوق أن هالفونديشن من نوع السيروم
يغطي الخطوط التعبيرية والخطوط و التجاعيد الصغيرة و يمليها
في حين الفونديشنات العادية تبرز هالعيوب أكثر
و يعطيك بشرة نضرة و طبيعية و بتغطية خفيفة لمتوسطة
المنتج يعد بفوائد علاجية تحاكي الكولاجين
الفونديشن فيه 14 درجة مختلفة
أنا من أنصار هالنوع من الفونديشنات
أحب التغطية المتوسطة و اللوك الناتشورال
و مثل البرايمر اللي قبله الفونديشن في خصائص و مكونات تأخر علامات الشيخوخة
ما أعرف مدى صحة هالكلام بس الفونديشن كتغطية و لوك عجيب عجيب
صار الفونديشن المفضل عندي
إذا لاحظتوا الفونديشن و البرايمر اثنينهم ما فيهم عامل
SPF
أو واقي الشمس
معناته ممتاز للتصوير لان عامل الوقاية من الشمس يسبب انعكاس الضوء على البشرة في الصور
يعني باختصار فونديشن مثالي
اذا حبيتوا تستخدموه في فترة النهار حطوا واقي شمس تحت كبرايمر
نفس الشي ما شفت أي عيوب بالمنتج
أوزع الفونديشن بفرشاة فونديشن و بعدين بالطبطبة ببيوتي بلندر رطب
المنتج الأخير من هالماركة هو الكونسيلر
TERRYBLY DENSILISS CONCEALER
نفس الخصائص للمنتجين اللي فوق كونه علاجي و يأخر علامات الشيخوخة و فيه سيروم علاجي يغطي الخطوط الدقيقة و التجاعيد الصغيرة
بالإضافة أنه يعالج الهالات السودة و الانتفاخات تحت العين اذا استخدم بانتظام
الكونسيلر فيه 6 درجات
الكونسيلر ممتاز من ناحية اللون و ما يخطط بعد فترة حتى في فترة الصيف مع الحر و الرطوبة
اللي لاحظته أن تغطيه ما كبيرة يعني اذا هالاتك غامقة ما يقدر يغطيها لوحده بس ممكن تحطي كوركتور تحتها
أما من ناحية علاجية تبون الصراحة ما أشوف أن خفف هالاتي أبدا و ما أظن أن في أي منتج ممكن يعالج الهالات أما الانتفاخات فما أعاني منها فما أقدر أحكم عليها من هالجانب
جربت أوزع الكونسيلر بأكثر من نوع من الفرش و حتى بالبيوتي بلندر و ما حبيت النتيجة
أفضل نتيجة حبيتها كانت باستخدام أصبعي بالطبطبة الخفيفة
هذي درجات الفونديشن و الكونسيلر اللي خذيتهم
بالنسبة للأسعار
البرايمر :88 يورو
الكونسيلر: 52 يورو
الفونديشن: 86 يورو
كتبت لكم الأسعار باليورو لأني اشتريتهم من سيفورا فرنسا ما أعرف أسعارهم في مكان ثاني
موقعهم يقول أن الماركة تنباع في سيفورا الامارات بس ما أذكر أني شفتها هناك
الماركة ممتازة و في منتج أخير عندي منهم بس راح أحطه في موضوع مستقل لأن يخص العناية بلبشرة
هل راح اشتريهم مرة ثانية ؟
أكيد هالثلاثة صاروا من مفضلاتي خلال 2015
أشوفكم على خير
مع محبتي
صفاء
