مراحب صبايا
اليوم بكلمكم عن ثلاث ايلينرات سائلة من ثلاث ماركات مختلفة و بسوي مقارنة بينهم
هذول ضيوف موضوعنا اليوم
من فوق:
Tattoo Liner from Kat Von D (Trooper)
Marc Jacob Magic Marc'er Precision Pen Waterproof Liquid Eyeliner (Blacquer)
Maestro eye liner from Giorgio Armani
مثل ما أنتوا شايفين كلهم ايلينرات سائلة علي شكل أقلام و كلهم باللون الأسود
مارك جاكوب و كات فون دي يتوفروا باللون البني بعد بس أرماني متوفر باللون الأسود فقط
بتكلم عنهم واحد واحد
نبدأ فكات فون دي
مؤسسة الماركة بالأصل هي تاتو ارتست
و كل شي في مكياجها ثباته عالي و اللون قوي
فرشاتها مثل ما هو واضح جدا نحيفة و دقيقة بالرسم
تنشف بسرعة
و سهل جدا الرسم بيها و الوحيدة اللي تضبط معاي فيها رسمة كيلوبترا
وايدين ما يحبون هالرسمة
هي ما تليق على كل العيون بس علي تطلع حلوة لأن عيوني بعيدة عن بعض شوي
في موقع سيفورا سعرها 19 دولار
ما أحس سواده فاحم
بس أنا مو وايد أحب الفاحم يعطيني لوك حاد<< يمه خفت
نجي للايلينر الثاني
من مارك جاكوب
من الماركات الحديثة العهد في المكياج
عندهم كم شغلة حلوة و عندهم أشياء بدون تعليق
هالايلينر في بلوغرز مدحوه و حبوه و في اللي ذموه و كرهوه
حبيت أقول لكم قبل ما تحكموا على أنه ناجح أو فاشل من كلام حد عنه
اعرفوا بالضبط شو اللي ما عجب هالشخص فيه يمكن اللي ما اللي ما خلاه يحبه هي الخاصية اللي أنت تبينها
هالايلنر سواده أقوى و أفحم من الاثنين الثانيين
و ثباته حلو مثل كات فون دي
مذكور أنه مضاد للماي
ما حسيت بهالشي..يعني لو دمعت عيني أو غسلت وجهي بالماي بيروح عادي
فرشاته أيضا دقيقة و سهل بالرسم بس فرشاة كات فون دي أفضل منها
في لمعة بلاستيكية لما ينشف
البعض ما يحب هاللمعة.. أنا ما أمانع
و صح تنشف بسرعة
الباكجغ مالها فخم و جميل من كذي السعر في العلالي
سعره في موقع سيفورا 30 دولار
الايلنر الثالث و الأخير من
أرماني
هذا أفشل و أسوء ايلينر جربته في حياتي
فرشاته ثخينة بعض الشي
تلطخ بالرسم
تنشف بسرعة
و تطير في ساعتين حتى بدون دموع أو ماي
سواده عادي يميل للرمادي أكثر
الباكجنغ ماله يشبه مال كات فون دي
سعره على موقع سيفورا 36 دولار
أغلى من مارك جاكوب على ايش ما أدري اذا الباكج ماله عادي جدا و المنتج بعد أقل من عادي
هذي صورة سواتش للايلينرات الثلاثة
واضح من هالثلاثة أن الكات فون دي هو المفضل عندي من كل النواحي
حاليا قاعدة أجرب ايلينر جديد
بكتب تجربتي بعد كم استعمال
ان شاء الله تكونوا استفدتوا من الموضوع
مع تحياتي
صفاء
