مساء الخير
أدري من زمان ما كتبت شي في المدونة.. انشغلت فترة شهر رمضان مع العيلة و تجهيزات العيد و العزايم و ما حصلت فرصة أني أكتب..
اليوم بخبركم عن روتيني بالفترة الأخيرة للشعر..
من حوالي سنة صبغت شعري و نسيت أخبرهم يستخدموا لي صبغة بدون أمونيا لأن فروة رأسي تتحسس منها و صابتني حساسية و حكة مزعجة .. رحت لطبيبة أمراض جلدية .. قالت لي أن هالحساسية لأن فروة رأسي دهنية و مع الحجاب و الحر و الرطوبة تتحسس و تصير هالحكة و الصبغة مالها دخل باللي أعانيه!!
أنا ما اقتنعت بكلامها و إلا كنت بعاني من هالحساسية طول عمري مو بس الحين.. و ليش بدت أول ما صبغت مو قبل!!
على كل حال وصفت لي شامبو نيزورال
Nizoral
جفف لي شعري أكثر ما هو جاف و ما عالج الحكة ..
و أنا أخبرهم بالصالون عن هالمشكلة وصفوا لي منتجات من كريستاس للعلاج و طلبوا مني أبدأ معاهم علاج بالصالون عشان أحل هالمشكلة
وصفوا لي ثلاث منتجات اللي هي هذي
و المنتجات هي مقشر لفروة الرأس بالكافيار و شامبو لحفظ توازن فروة الرأس و أخر شي بلسم لأطراف الشعر
أول شي بعد ما نبلل الشعر نفرك فروة الرأس بالمقشر فقط الفروة مو الشعر و نسوي تدليك للفروة مدة خمسة دقايق و بعدها نشطف الرأس
CHRONOLOGISTE
THE GOMMAGE
مثل ما ذكرت سابقا المنتج مزود بالكافيار و يستخدم لكافة أنواع الشعر
و لأنه مقشر فهو يزيل الترسبات اللي تنتج من استخدام مستحضرات التصفيف و ترسبات الشامبو و حتى الدهون اللي تفرزها فروة الرأس
و بالتالي تشيل الجلد الميت و القشرة الدهنية و يحافظ على صحة و رونق الشعر لأن الفروة تتنظف و تتنفس أحسن
ما شفت فيه أي رائحة .. و بالفعل أحس بانتعاش في فروتي لما استخدمه و خلصت علبة و شريت ثانية
سعره على ما أعتقد ب 25 ريال عماني.. و اشتريته من الصالون .. أي صالون يبيع منتجات كريستاس تحصلونه عندهم
الخطوة الثانية هي الشامبو المخصص لحفظ توازن الفروة و يستخدم على الفروة و الشعر و تدللك فيه فروة الرأس
Bian Divalent
هالشامبو مخصص للفروة الدهنية و الشهر الجاف يعني اللي نفس حالتي..
يخفف من دهون الفروة بدون ما يجفف الشعر بالعكس يوفر الترطيب اللي يحتاجه الشعر
يحتوي على حمض السالسيليك اللي يقشر فروة الرأس بلطف و فيتامين بي6 اللي ينظم انتاج الزهم
نفس الشي ما شميت فيه أي ريحة
أما بالنسبة لسعره فالمعذرة ما أعرفه أن شريت المجموعة مع بعض فما سأالت عن سعر كل منتج لوحده..
أخر خطوة هي البلسم لأطراف الشعر
ELIXIR ULTIME
FONDANT ELIXIR ULTIME À L'HUILE SUBLIMATRICE
يعطي الشعر نعومة و لمعان صحي بدون ما يترك أثر دهني.. و الريحة تخبل و جنان
بعد ما نغسل الشعر من الشامبو نحط البلسم على أطراف الشعر و ندلك الشعر بس بدون الفروة و يشطف بالماي..
يناسب كل أنواع الشعر
كل واحد من هالمنتجات من مجموعة مختلفة عشان تلبي حاجات شعري يعني مو لازم ناخذ من نفس المجموعة ممكن ننوع عادي..
بالنسبة لاستفادتي منهم.. حبيتهم هم الثلاثة بس استفادتي منهم ما بتكمل إلا لحد ما أسوي جلسات العلاج في الصالون بس الحساسية خفت بشكل ملحوظ و شعري رجعت له حيويته
و هذا كل شي لليوم
تصبحوا على خير
صفاء
