مساء الخير
حديثنا اليوم عن ثلاث منتجات من ماركة عربية و تحمل اسم ماكيير مشهور
من ماركة بسام فتوح
مؤخرا فتح عندنا بوتيك بسام فتوح بالقرم و دخلت عندهم عشان أشوف المكان..
الديكور رهيب و أنثوي ..كله وردي و فيه ورد و فراشات..
تمنيت غرفة مكياجي تكون كذا... قلب كبيررررر
المهم أخذت منهم ثلاث منتجات
البي بي كريم ...و البرونزر.. و روج
ببدأ بالبي بي كريم
عندهم درجتين فقط..فاتحة و وسط.. اللي عندي الوسط
الكريم كونه بي بي كريم
- يرطب البشرة
- يوحد اللون
- ينور البشرة
- فيه حماية من اشاعات الشمس
- يخفي العيوب
- ثباته عالي
- تغطية و شكل طبيعي
طبعا هذي وعودهم ..يا ترى شو كان رائي عنه لما جربته؟
ترطيبه حلو بس مو كفاية لوحده على الأقل مو لأصحاب البشرة الجافة و المختلطة لازم مرطب تحته..
تغطيته من خفيفة لمتوسطة
شكله فعلا طبيعي و ينور البشرة و ثباته حلو اذا حطينا قبله مرطب و ثبتناه ببودرة حرة و مثبت مكياج
لأن بعد فترة يدهن بدون بودرة
فيه مضخة و يجي كتيوب فوايد عملي بأنه تاخذنه بالشنطة و تضمني أنه ما يتأكسد بسرعة لأنه مافي ضوء يدخل له
عتبي الوحيد أنه حماية عليه وايد صغيرة بس
SPF 15-25
ما مكتوب على العلبة بس أذكر أني شفته بالمحل
و ما مذكور حتى بموقعهم
ما مكتوب على العلبة بس أذكر أني شفته بالمحل
و ما مذكور حتى بموقعهم
يعني لازم أرجع أحط منه بعد ساعتين بالكثير بس أنا أحط تحته واقي شمس
SPF 50
و يمشي الحال
نجي الحين للبرونزر
يجي بدرجتين .. الأولى لون واحد برونزي فيه شيمر
و هذا الثاني جاي برونز مع درجة لؤلؤية و لما يخلطوا يعطوا لون عجيب
شكله طبيعي و درجة البرونز ماهي غامقة و لا جاية على برتقالي..
اسم الدرجة شمس
نجي أخر شي للروج
!!شوفوا الباكجنغ كيف رقيق و ناعم
الدرجة اسمها
Haifa's lips
هاللون كان يستخدموا بسام فتوح على هيفاء وهبي و سماه باسمها
اللون جميل بصراحة وردي حقيقي ..لا يميل للبرتقالي و لا الأحمر و لا الأزرق
اللون حلو بس ممكن يتلاقى في ماركات ثانية و ترطيبه وسط
اذا شفايفك جافة راح تبين القشور
ثباته حلو يعني ظل 5-6 ساعات مع أني شربت قهوة بس لما أكلت راح الروج
مكان الشراء و الأسعار:
اشتريت كل المنتجات من بوتيك بسام فتوح في القرم
و شفتهم متوفرين في فرع السلام اللي في الافنيوز
سعر البي بي كريم 21.5 ريال عماني
سعر البرونزر 20 ريال عماني
سعر الروج 12 ريال عماني
و هذا كل شي لليوم
مع تحياتي
صفاء
